अर्को मान्छे

झण्डै तीस वर्ष पुरानो एउटा डण्डीफोरको
धमिलो खतमुन्तिर
जवान बुढ्यौलीका रेखाहरु,
सुक्दै गएको तलाउजस्ता आँखाहरु,
बाँझो खेतजस्ता
फुस्रा र चाउरा ओठहरु,
र
यौवनका बेला
हजारौ‌ आँखाहरुसँग ‘हाइड एण्ड सीक’ खेलेको
छातीमाथिको एउटा कामुक कोठीलाई
निकैबेरसम्म एकटकले नियालेपछि
ऊ सम्झन्छे
जवानीमा उसको एकतर्फी प्रेममा
पागल भएको एउटा अनाडीलाई।

त्यसपछि उसलाई फेरि एकपटक
सुरुदेखि बाँच्ने रहर लाग्छ।

कमलकुमार@२००९ फेब्रुअरी ८